Обрўли ташкилотлардан ишдан бўшатилаётганлар, ҳайдалаётганлар ва панд еганлар ҳақида охирги вақтлар тез-тез дуч келаяпмиз. Бу галги «қаҳрамонимиз» эса 34 минг сўмлик маҳсулотларни деб халқ ичида изза бўлди.
З.Қобулова (исм-шарифлар ўзгартирилган) Олмалиқ шаҳридаги 34- сонли МТТда тарбиячи бўлиб ишлайди. Муқаддам судланмаган, маъмурий жавобгарликка ҳам тортилмаган. Уни қандайдир «жин урди-ю», 2023 йил 6 феврал куни соат тахминан 18:00 ларда 34-МТТдан ноқонуний равишда 34 минг сўмлик маҳсулотларни, яъни, ўзганинг оз миқдордаги мулкини растрата қилиш йўли билан талон-тарож қилганлиги аниқланди.
Ҳуқуқбузар З.Қобулова ушбу ҳаракатлари билан Ўзбекистон Республикаси МЖтК 61-моддасининг 1- қисмида назарда тутилган ҳуқуқбузарликни содир қилди. Жиноятнинг катта-кичиги бўлмайди, қонун олдида эса эркак ҳам, аёл ҳам баробар.
Юқоридаги асослар ва Ўзбекистон Республикаси МЖтКнинг 309, 310-311-моддаларига асосан, суд З.Қобуловага нисбатан МЖкТ 61- моддасининг 1- қисмида назарда тутилган ҳуқуқбузарликни содир этганликда айбли деб топиб, унга шу модда билан базавий ҳисоблаш миқдорининг 1 баравари миқдорида, яъни 300 минг сўм жарима жазоси қўлланилди.
Зафар Мусаев,
шаҳар Қўриқлаш бўлими
сафдор ходими.