ВАРШАВА, 7 апрель. /»Дунё» АА/. Польша-Осиё савдо палатаси президенти Януш Пехочински «Дунё» АА учун интервьюсида Қозоғистон Президенти Қасим-Жомарт Тоқаевнинг 5 апрель куни Хивага буюрган ташрифи якунлари ҳақидаги фикрларини билдирди:
— Қозоғистон Президенти Қасим-Жомарт Тоқаевнинг Хивага ташрифи нафақат Ўзбекистон, балки бутун Марказий Осиё учун жуда муҳим ва долзарб воқеликдир.
Биз Марказий Осиёда сиёсий-дипломатик, молиявий-иқтисодий, маданий-гуманитар соҳаларда амалга оширилаётган ўзгаришларни, жумладан, энг олий даражадаги алоқаларни диққат билан кузатиб боряпмиз.
Сўнгги йилларда мустаҳкамланиб бораётган яхши қўшничилик ва ишонч муҳити ҳамда Марказий Осиёда чуқурлашиб бораётган интеграция жараёнлари барчамизда катта қизиқиш уйғотмоқда.
Маълумки, Қозоғистон Ўзбекистоннинг учта йирик ташқи савдо ҳамкорларидан биридир. 2023 йилда ўзаро товар айирбошлаш ҳажми 4,4 миллиард АҚШ долларини ташкил этди. Эътиборлиси, Қозоғистонда Ўзбекистон капитали иштирокида 1400 дан ортиқ корхона фаолият юритмоқда.
Марказий Осиё янги Польша ҳукумати ташқи сиёсатининг устувор йўналишларидан бири ҳисобланади. 2019 йилда қабул қилинган минтақавий ҳамкорликдаги ижобий ўзгаришларни рағбатлантирадиган ва Европа Иттифоқи манфаатлари учун ушбу минтақанинг ўсиб бораётган стратегик аҳамиятини таъкидлайдиган Европа Иттифоқининг Марказий Осиё учун янги стратегиясини тўлиқ амалга ошириш учун бор куч-ғайратимизни ишга солишга тайёрмиз.
Польша Тошкентнинг Марказий Осиё ва Европа ўртасидаги транспорт-коммуникация алоқаларини, биринчи навбатда, Ўрта йўлак – Транскаспий транзит йўлагини шакллантириш орқали ривожлантириш борасидаги саъй-ҳаракатларини юқори баҳолайди. Марказий Осиё бешлиги биргаликда ҳаракат қилиши керак. Ишончим комилки, Польшанинг янги ҳукумати Марказий Осиёда барқарор ривожланиш лойиҳаларини амалга ошириш учун маблағ ажратади.
Шубҳасиз, Президент Қасим-Жомарт Тоқаевнинг Ўзбекистонга бўлиб ўтган ташрифи якунлари икки томонлама ҳамкорликни ривожлантиришга кучли суръат бағишлайди.