Суперлиганинг 17-турида «Дўстлик» стадионида «Бунёдкор» меҳмони бўлган ОКМК ФК муҳим ғалабага эришди.
Чемпионатда юқори ўринлар учун курашаётган ОКМК ФК ҳамда Суперлигада жон сақлаб қолишга интилаётган «Бунёдкор» клубига 3 очко сув ва ҳаводек зарур эди. Шу боисдан ҳам ҳар иккала жамоа вакиллари ўйинни эҳтиёткорлик билан бошлашди.
Биринчи тайм якунигача «кончилар» ва «қалдирғочлар»да гол уриш учун етарлича имкониятлар бўлди. Аммо иккала жамоа дарвозабонларининг ишончли ўйини сабаб дастлабки 45 дақиқаликда ҳисоб очилмади.
Иккинчи тайм олдидан Миржалол Қосимовдан керакли кўрсатмаларни олган вакилларимиз ҳимояни эсдан чиқармаган ҳолда рақиб томон ҳужумкорликни янада оширишди. Ва ниҳоят кетма-кет рейдлар жамоамизга наф келтирди. Учрашувнинг сўнгги дақиқалари ўтиб бораётган бир паллада, яъни 86-дақиқада Нодирбек Абдураззоқов бурчакдан «Бунёдкор» жарима майдончасига ҳаводан тўпни оширди, узатмага биринчилардан бўлиб пешвоз чиққан Авазбек Ўлмасалиев боши билан тўпни дарвозага «михлаб» қўйди — 0:1.
Ушбу гол ўйинда ягоналигича қолди ва Олмалиқ жамоаси муҳим 3 очкони қўлга киритиб ортга қайтди. «Кончилар» бу муваффақиятдан сўнг, очколар сонини 32 тага етказиб, турнир жадвалида 2-ўринга кўтарилиб олди.
Эндиликда жамоамиз ФИФА кунлари сабаб Суперлига клублари қатори қисқа танаффусга чиқишади. Шундан сўнг, «кончилар» чемпионатнинг 18-тур доирасида уйда, яъни Олмалиқда «Сурхон» жамоасини қабул қилади. Ушбу ўйин 16 сентябрга белгиланган.
⚽️ Суперлига, 17-тур.
🔰 «Бунёдкор» — ОКМК ФК 0:1
🗓 27 август, сешанба.
🏟 «Дўстлик» стадиони
Бош ҳакам: Шавкат Насибуллаев
Ёрдамчи ҳакамлар: Александр Буров, Акмал Ғиёсов
Тўртинчи ҳакам: Алишер Тўхтасинов
ВАР: Равшан Абдувоҳидов
АВАР: Эдита Миробидова
Назоратчи: Рустам Бобомуродов
Комиссар: Шоҳрух Саид
Дарвозабон: 35.Жавоҳир Илёсов.
Ҳимоячилар: 21.Саидафзалхон Аҳроров (22.Шоҳруҳ Гадоев, 67), 6.Авазбек Ўлмасалиев, 3.Сардор Раҳмонов, 7.Дилшодбек Аҳмадалиев.
Ярим ҳимоячилар: 28.Ариҳиро Сентоку, 15.Ойбек Рустамов, 4.Миржамол Қосимов (77.Нодирбек Абдураззоқов, 84).
Ҳужумчилар: 10.Хуршид Ғиёсов, 11.Клейди Датси (18.Азиз Холмуродов, 67), 9.Рубен Санчез (19.Михаил Клепач, 84).
Захирадагилар: 1. Валижон Раҳимов, 5.Гиорги Папава, 13.Элдорбек Бегимов, 18.Азиз Холмуродов, 19.Михаил Клепач, 22.Шоҳруҳ Гадоев, 27.Али Абдураҳмонов, 30.Аброр Саримсоқов, 77.Нодирбек Абдураззоқов.
Огоҳлантириш: Авазбек Ўлмасалиев (86).
Али Абдуаҳадов, ОКМК футбол клуби Ахборот хизмати медиа муҳаррири.