Мамлакатимизда ҳам сиёсий, ҳам иқтисодий ислоҳотларни ҳаётга татбиқ этиш пайтида коррупцияга қарши кураш — юрт тақдири, мамлакат келажаги учун ҳар қачонгидан муҳим ва долзарб аҳамият касб этади.
Коррупция фаолияти хуфёна иқтисодиётнинг асосий турларидан биридир. Бугунги кунда республикамизда мазкур жиноятчиликнинг сабабларини аниқлаш чоралари кўрилмоқда, унинг домига тушганлар эса қаттиқ жазоланмоқда. Бундай иллатнинг олдини олиш ва унга қарши курашда биргаликдаги ҳаракатгина самарали натижаларга эришишнинг энг мақбул йўли бўлиб ҳисобланади.
Коррупциявий ҳолатларнинг олдини олишга қаратилган тадбирда савдо комплексларидаги ҳар бир сотувчи ва тадбиркорлар билан суҳбатлашиб, бу борадаги муаммо ва таклифлар ҳам ўрганилди. Суҳбат давомида мана шундай ҳуқуқбузарликларга дуч келинганда Солиқ хизмати органларининг “Ишонч» телефонлари, Солиқ тўловчиларнинг шахсий кабинети, «Электрон солиқ хизматлари» портали ҳамда телеграм ижтимоий тармоғидаги @dsq_anticorrupciya_bot алоқа каналлари орқали хабар бериш мумкинлиги ва мурожаатчининг шахси сир сақланиши кафолатланиши таъкидланиб, махсус флаэрлар тарқатилди.
Олмалиқ шаҳар Прокуратураси ҳузуридаги Солиққа оид жиноятларга қарши курашиш департаманти томонидан шаҳар солиқ инспекцияси ходимлари иштирокида мунтазам равишда коррупцияга қарши курашиш бўйича профилактик тадбирлар ўтказилиб, ходимлар тадбиркорлик субъектлари фаолиятига асоссиз аралашиш, уларнинг фаолиятига тўсқинлик қилиш ҳамда ноқонуний тадбиркорлик фаолиятига ҳомийлик қилиб, моддий манфаатдор бўлмаслик, коррупцион хатти-ҳаракатлар содир этмасликлари тушунтириб борилади.
Мухтасар айтганда, коррупция — тараққиёт кушандаси, хавфсизликка таҳдид туғдирувчи хавфли жиноят. Бу иллатга қарши курашиш тегишли органларнинггина эмас, балки барча фуқароларнинг бурчи бўлиши зарур. Шундагина ушбу хавфни бартараф этишга муносиб ҳисса қўшган бўламиз.