…Ҳаёт-театр саҳнасидаги пьеса кабидир. Унинг қанча давом этгани эмас, қанчалик яхши ўйналгани муҳимдир.
СЕНЕКА
…Март шафақлари ҳар бир гул япроғида акс этган хонадаман. Стол устида ҳар хил сметалар, ўзим учун тушуниксиз ёзувлар, китоб жавонида қурувчиликка оид турли китоблар. Бир қарашда бу хона ёзувчининг, ижодкорнинг манзилига ҳам ўхшаб кетади, назаримда. Қаҳрамонимиз — Козлова Наиля Халитовна қурувчилик соҳасида ўзига хос тажриба мактабини ярата олган қурувчилардан, лойиҳаловчилардан биридир.
Шундай одамлар бўладики, улар ўз билими, касбига бўлган садоқати ва фидокорлиги билан ишлаётган даргоҳнинг ЮЗИга айланади, ташкилот номи айтилганда дарров ўша одамлар ёдингизга келади.
Биз қачон ОКМК Лойиҳа ишлари бошқармасига борсак Козлова Наиля Халитовна номини кўп бора эшитиб қайтамиз. Шу сафар борганимда қурувчи, смета ишларига бош-қош қаҳрамонимизни синчиклаб кузатдим: аслида бунда бирор бир мураккаб нарсанинг, формуланинг ўзи йўқ. Ҳозирда Бошқарманинг Техник иқтисодий асосланган лойиҳаларни сметалаш ва ташкиллаштириш бўлими бошлиғи сифатида фаолият юритиб келаётган Наиля опа жабҳага кириб келаётган ёшларга ўзидан кейин унинг ишларини давом эттирадиган авлод деб, бор билим ва бисотини беришга ошиқаётганлигини кўраман. Ёшлар ҳам ўз навбатида Наиля Халитовна яратган тажриба мактабини яхши ўташга, бу борадаги анъаналарни янги босқичга олиб чиқишга ҳаракат қилишмоқда. Бугунги кунда жамоанинг диққатга молик ишларидан бири сифатида Ковулди кони маъданларидан биринчи ва иккинчи метал олишга мўлжалланган Олтин саралаш фабрикасининг қурилишини айтишимиз мумкин. Ҳозирда технологик босқичда бўлган мазкур саноат объектининг лойиҳалаш ишларида Наиля Халитовна, Лойиҳа ишлари бошқармаси бошлиғи – Анвар Ураимов бошчилигидаги жамоа сидқидилдан меҳнат қилиб ўз ташаббусларини кўрсатиб келишмоқда.
Шуни алоҳида таъкидлаш керакки, сўнгги беш йилликда шаҳримизда қад кўтарган кўплаб бунёдкорлик ишларини лойиҳалаштиришда айнан биз сўз юритаётган жамоа таъбир жоиз бўлса, ўз ижодкорлигини, креативлигини муносиб равишда кўрсата олди. Бунга мисол қилиб, жаҳон андозалари асосида лойиҳалаштирилиб, қуриб битказилган Муҳандислик мактабини олишимиз мумкин.
Наиля Халитовна қурувчи аёл сифатида ўз касби хақида завқ билан гапираркан, яна бир бор “касб инсонни эмас, ИНСОН касбни безаши”га амин бўламиз. Бугун ҳақли маънода айтиш мумкинки, қаҳрамонимиз каби ўз меҳнати ортидан бахт топган, ёшларнинг ҳаммаслагига айланиб, “Устоз-шогирд анъанаси”ни муносиб равишда давом эттириб келаётган катта авлод вакиллари комбинатнинг турли меҳнат жабҳаларида кўплаб топилади. Улар дунёга олтин чиқараётган олтин корхонанинг ОЛТИН ОДАМЛАРИДИР. ОЛТИН ОДАМЛАРНИНГ ОЛТИН ОДИМЛАРИНИ бугун дунё келиб кўриб кетмоқда, тажрибаларини ўзлаштиришмоқда.Муҳандислик мактаби бунёд бўлгандан бери бир неча хорижий давлат вакиллари, делегациялари бу ерда меҳмон бўлиб кетишди. Германия тажрибалари асосида қурилган ушбу даргоҳнинг лойиҳа ва қурилиш услуби бугун кўплаб проектларга андоза ва асос бўлиб хизмат қилмоқда. Ҳар бир яратилган янги бунёдкорлик ортида ижодкорнинг улкан калби туради. Ижодкор деган таъбирни нафақат ёзувчи-ю шоирга, балки қурувчилик соҳасида, лойиҳа ишларида фаолият юритиб келаётган давр қаҳрамонларига ҳам менгзасак бўлар.
Ўз ёшига нисбатан ёш кўринадиган Наиля опага ёш борасида савол берганимизда “Умримиз неча йил яшаганимиз билан эмас, унда қанчалик тўғри яшаганимиз билан салмоқлидир ” дея жавоб берди. Ва мана шу жавобдан сўнг Наиля опанинг ўз умрининг донишманд фаслини ўтаётганлигини қалбан ҳис қилдим… Ўз ишига санъат даражасида қарайдиган қаҳрамонимиз ва унга ўхшаган инсонларнинг фидокорона меҳнатлари туфайли гигант корхона равнақ одимларини ташлайверади.
Дилафрўз Эгамбердиева.