Соғлом турмуш тарзи, жисмоний тарбия ва спортни оммалаштириш давлат сиёсатининг устувор йўналишларидан бири ҳисобланади. Мамлакатимизда ёшлар ўртасида спорт мусобақаларини ташкил этиш, уларнинг иқтидорини ҳар томонлама ривожлантириш учун зарур шарт-шароитлар яратиб берилмоқда. Ана шундай мусобақалардан бири — белбоғли кураш бўйича ўсмирлар ўртасидаги Ўзбекистон чемпионатида ОКМК ёш курашчилари юксак натижаларга эришди.
Қашқадарё вилоятининг Чироқчи туманида жорий йил 10–13 июль кунлари спортнинг белбоғли кураш тури бўйича 2012–2013 йилларда туғилган ўсмирлар ўртасида Ўзбекистон чемпионати бўлиб ўтди. Ушбу мусобақада “Олмалиқ кон-металлургия комбинати” АЖ ходимлари касаба уюшмаси Кенгаши қошидаги спорт ва жисмоний тарбия бўлими мураббийси Баҳодир Шеранов тайёрлаган ёш курашчилар ҳам муносиб иштирок этишди.
Беллашувлар натижасига кўра, 40 кг вазн тоифасида қатнашган Меҳроб Тошпўлатов барча рақибларини мағлуб этиб, мамлакат чемпионлигини қўлга киритди ва олтин медалга сазовор бўлди. Шу вазн тоифасида иштирок этган яна бир спортчи — Исломбек Ўрозалиев эса учинчи ўринни эгаллаб, бронза медали билан тақдирланди. Бу ютуқлар комбинатда спортни оммалаштириш, ёш авлодни жисмоний тарбия ва соғлом турмуш тарзига жалб этиш борасида амалга оширилаётган тизимли ишларнинг натижаси ҳисобланади.