Озиқ-овқат маҳсулотларини нотўғри сақлаш, тайёрлаш ёки истеъмол қилиш натижасида юзага келадиган заҳарланиш ҳолатлари аҳоли саломатлигига жиддий хавф туғдиради. Айниқса, ёз ойларида ҳаво ҳароратининг кўтарилиши озиқ-овқат маҳсулотларининг тез бузилишига сабаб бўлиб, заҳарланиш хавфини оширади. Шу боис ҳар бир фуқаро озиқ-овқат хавфсизлиги қоидаларига қатъий риоя қилиши зарур.
Озиқ-овқатдан заҳарланиш бактериялар, вируслар, замбуруғлар ёки уларнинг токсинлари билан ифлосланган маҳсулотларни истеъмол қилиш натижасида юзага келади. Заҳарланишнинг асосий белгилари кўнгил айниши, қайт қилиш, ич кетиши, қорин оғриғи, тана ҳароратининг кўтарилиши ва умумий ҳолсизликдан иборат.
Маҳсулотларни тўғри танланг
Озиқ-овқат маҳсулотларини харид қилишда уларнинг яроқлилик муддати, сақлаш шароити ва қадоқланиш ҳолатига эътибор беринг. Қадоқланиши шикастланган, муддати ўтган ёки сифати шубҳали маҳсулотларни харид қилманг.
Шахсий гигиенага риоя қилинг
Овқат тайёрлаш ва истеъмол қилишдан олдин қўлларни совун билан яхшилаб ювиш зарур. Шунингдек, мева ва сабзавотларни истеъмол қилишдан аввал тоза сувда яхшилаб ювиш керак.
Маҳсулотларни тўғри сақланг
Гўшт, сут, балиқ ва бошқа тез бузиладиган маҳсулотларни совутгичда сақлаш лозим. Тайёр овқатларни хона ҳароратида узоқ вақт қолдирмаслик тавсия этилади.
Хом ва тайёр маҳсулотларни алоҳида сақланг
Хом гўшт, парранда ва балиқ маҳсулотлари тайёр таомлар билан бир жойда сақланмаслиги керак. Бу касаллик қўзғатувчи микроорганизмларнинг бир маҳсулотдан бошқасига ўтишининг олдини олади.
Овқатларга етарли иссиқлик ишлови беринг
Гўшт, парранда, тухум ва балиқ маҳсулотларини тўлиқ пишириш зарур. Етарли даражада пиширилмаган маҳсулотлар хавфли микроорганизмлар манбаи бўлиши мумкин.
Фақат хавфсиз сувдан фойдаланинг
Овқат тайёрлаш ва ичиш учун санитария талабларига жавоб берадиган тоза ичимлик сувидан фойдаланиш муҳимдир.
Кўча савдосидаги маҳсулотларга эҳтиёткорлик билан ёндашинг
Номаълум жойларда, санитария талабларига риоя қилинмаган шароитларда сотилаётган озиқ-овқат маҳсулотларини истеъмол қилиш тавсия этилмайди.
Заҳарланиш аломатлари кузатилганда нима қилиш керак?
Агар озиқ-овқат истеъмолидан сўнг кўнгил айниши, қайт қилиш, ич кетиши ёки бошқа нохуш белгилар пайдо бўлса, зудлик билан тиббий муассасага мурожаат қилиш лозим. Ўзбилармонлик билан даволаниш айрим ҳолларда касалликнинг оғирлашишига олиб келиши мумкин.
Н. Халилов,
Тошкент вилояти ИИББ
ЖХХ ходими, сафдор.
Об авторе
