6 июль куни шаҳримиздаги 22-сонли ўрта мактабнинг 1971 йилги битирувчилари навбатдаги файзли учрашувга жам бўлишди. Бу йил улар учун алоҳида аҳамиятга эга бўлди, зеро 1954 йилда туғилган синфдошлар 72 ёшни қарши олар экан, мактабни тамомлаганларига 55 йил тўлиши муносабати билан яна бир дастурхон атрофида йиғилдилар.
Учрашув Гулсина Эргашева, Раҳима Абдикадирова, Ҳалима Маркабаева ва Мадали Анорбоев ташаббуси билан юқори савияда ташкил этилди. Тадбирда қирққа яқин синфдош иштирок этиб, йиллар оша сақланиб келаётган меҳр-оқибат, дўстлик ва ҳамжиҳатлик яна бир бор ўз ифодасини топди.
Битирувчилар ўзларини камолга етказган азиз даргоҳ —22-сонли ўрта мактабни чуқур эҳтиром билан ёдга олдилар.
-Бу билим маскани нафақат фан сирларини, балки ҳалоллик, меҳнатсеварлик, инсонпарварлик, Ватанга муҳаббат ва бир-биримизни ҳурмат қилиш каби юксак инсоний фазилатларни ҳам сингдирган муқаддас маскан бўлган. Устозларимиз бизларга катта ҳаёт учун катта мақсадлар қўйиб яшашни ўргатишган. Улар орасида бошланғич синф ўқитувчимиз Амина Мухлисовна ва Одила Борисовна, юқори синф раҳбаримиз Мария Губаевна ҳамда София Абдуллаевна, тил ва адабиёт устози Салоҳиддин Турдиев, география фани ўқитувчиси Мариям Гумировна, физика ўқитувчиси Карим Халилович, тарих ўқитувчиси Раиса Альбекова, биология ўқитувчиси Сайёра Абзаловна, математика ўқитувчиси Муҳтарама Исҳоқовна, рус тили ўқитувчиси Лира Маҳмутовна Маҳмутова, немис тили ўқитувчилари Зилия Галиевна ва Раъно Алишеровна Қувандикова каби фидойи педагоглар бизга ўзимизни танитган (Аллоҳ раҳматига олсин), — дейди Гулсина Эргашева.
Учрашувда мактабга узоқ йиллар раҳбарлик қилган, Улуғ Ватан уруши қатнашчиси, тарих фанлари номзоди, юксак салоҳиятли педагог Турот Альбекович Альбеков алоҳида эҳтиром билан эсга олинди.
Учрашувнинг энг таъсирли лаҳзалари ҳаётдан эрта кўз юмган синфдошлар хотирасига бағишланди.
Олтин медаль соҳиби, синф сардори, иқтидорли нотиқ ва шоира Зулфия Қўшбой қизи Усманова (Исоқжонова) ёрқин хотира билан эсланди. Унинг истеъдоди, шеъриятга муҳаббати ва суҳандонлик маҳорати барчанинг меҳрини қозонган эди. Кейинчалик у Республика миқёсида ўтказилган «Марҳабо, талантлар!» танловининг бошловчиси сифатида маданий ҳаётда муносиб ўрин эгаллаган эди. Унинг ёруғ хотираси синфдошлари қалбида мангу яшайди.
Шунингдек, адолатпарварлиги ва юксак инсоний фазилатлари билан эл ҳурматини қозонган адвокат Абдурашид Исоқжонов ҳам самимий эҳтиром билан ёд этилди. У инсонларнинг ҳуқуқ ва манфаатларини ҳимоя қилиш йўлида сидқидилдан хизмат қилган, ҳалол ва виждонли инсон сифатида хотираларда сақланиб қолган.
Табобат соҳасида самарали меҳнат қилган, кўплаб аёлларга шифо улашган шифокор-гинеколог Муҳаббат Эшанқулова ҳам эзгу ишлари билан эсга олинди. Унинг камтарлиги, меҳрибонлиги ва инсонпарварлиги синфдошлари хотирасида абадий муҳрланган.
Ватан ҳимоясига умрини бағишлаган ҳарбий Исомиддин Алимов ҳам алоҳида эҳтиром билан тилга олинди. У хизмат фаолияти давомида интизоми, жасорати ва Ватанга садоқати билан юксак обрў қозонган, давлат мукофотлари ва юксак унвонларга муносиб кўрилган эди.
Қолаверса, Собир Абдуқодиров, Гулчеҳра Асраева, Шарофат Эрназарова, Саломат Деусбоева, Ҳурбуви Маматқулова, Ҳайтгул Зулфиқорова, Ҳолқинисо Бердиева, Каромат Абдурасулова, Мариям Жанталиева, Мавжуда Машева, Пардабой Юсуповлар вафот этган бўлишига қарамай, ўзларидан ўчмас из қолдиришди.
Файзли даврада ўтган йиллар, беғубор болалик, ёшлик хотиралари, устозлар насиҳатлари ва синфдошлик ришталари яна бир бор ёдга олинди. Бу учрашув барчага вақт ўтса-да, ҳақиқий дўстлик, меҳр-оқибат ва қадриятлар умрбоқий эканилигини англатди. Тадбир сўнгида устозлар ва ҳаётдан ўтган синфдошларнинг ёрқин хотираси уларнинг қалбларида абадий яшаши таъкидланди.
Бу синфдошларга қараб шуни англадимки, болаликдаги дўстлик риштаси жигарлик риштаси билар бир хил экан.
Мухлиса РАХМАТУЛЛАЕВА .
Об авторе
