Халқ депутатлари Олмалиқ шаҳар Кенгашининг навбатдаги 45-сессияси бўлиб ўтди. Сессияда шаҳар Кенгаши депутатлари, шаҳар ҳокими ўринбосарлари, тегишли ташкилот ва идоралар раҳбарлари, сиёсий партиялар вакиллари ҳамда оммавий ахборот воситалари ходимлари иштирок этишди.
Сессия кун тартибидан шаҳарнинг ижтимоий-иқтисодий ривожланиши, аҳоли фаровонлигини ошириш ва давлат дастурлари ижросини таъминлашга қаратилган бир қатор муҳим масалалар ўрин олди.
Жумладан, Ўзбекистон Республикаси Президентининг 2025 йил 25 декабрдаги 64-сонли топшириқлар баёни асосида коррупцияга қарши курашиш бўйича амалга оширилган ишлар муҳокама қилиниб, соҳада очиқлик ва шаффофликни таъминлаш, ҳуқуқбузарликларнинг олдини олиш юзасидан кўрилган чора-тадбирлар юзасидан ахборот берилди.
Шунингдек, ёшларнинг ёзги таътил даврини мазмунли ташкил этиш мақсадида ишлаб чиқилган “Долзарб 90 кун” амалий тадбирлар дастури кўриб чиқилди. Дастур доирасида ёшларни спорт, маданият, таълим ва касб-ҳунарга йўналтиришга қаратилган тадбирларни кенг қамровда амалга ошириш режалаштирилгани таъкидланди.
Сессияда Олмалиқ шаҳар “Инсон” ижтимоий хизматлар марказининг 2025 йил ҳамда 2026 йил биринчи чораги давомида амалга оширган фаолияти ҳам таҳлил қилинди. Марказ томонидан аҳолининг ижтимоий ҳимояга муҳтож қатламларини қўллаб-қувватлаш, манзилли ижтимоий хизматлар кўрсатиш борасида бажарилган ишлар юзасидан ҳисобот тақдим этилди.
Бундан ташқари, Ўзбекистон Республикаси Вазирлар Маҳкамасининг 462-сонли қарорига мувофиқ, шаҳар маҳаллалари кесимида “Саховат ва кўмак” жамғармаси маблағларини қайта тақсимлаш масаласи ҳам муҳокама қилинди. Мазкур маблағларни аҳолининг эҳтиёжманд қатламларига манзилли йўналтириш ва ижтимоий қўллаб-қувватлаш ишларини янада самарали ташкил этиш бўйича таклифлар кўриб чиқилди.
Кун тартибига киритилган барча масалалар депутатлар томонидан атрофлича муҳокама қилиниб, қарор лойиҳаларига қўшимча таклиф ва мулоҳазалар киритилди. Муҳокамалар якунида шаҳар ривожи, аҳоли турмуш даражасини яхшилаш ҳамда ижтимоий соҳалар самарадорлигини оширишга қаратилган тегишли қарорлар бир овоздан қабул қилинди.
Таъкидлаш жоизки, сессия жараёни очиқлик ва ошкоралик тамойиллари асосида ташкил этилди. Жамоатчиликни кенг хабардор қилиш мақсадида йиғилиш шаҳар Кенгашининг расмий Facebook саҳифаси орқали жонли эфирда намойиш этилди. Бу эса фуқароларнинг маҳаллий давлат ҳокимияти органлари фаолияти билан яқиндан танишиши ҳамда қарор қабул қилиш жараёнларидаги очиқликни таъминлашга хизмат қилди.
Об авторе
