Dunyoda beg‘araz yordam qo‘lini cho‘zuvchi insonlarni «volontyorlar», ya’ni ko‘ngillilar deb atashadi. Xo‘sh, bu harakat dastlab qanday paydo bo‘lgan?
Tarixiy manbalarga ko‘ra, ushbu ezgu harakatning ildizlari qadimgi Vizantiyaga borib taqaladi. Qiziqarli jihati shundaki, o‘sha davrlarda diniy bayramlar kuni imperatorning o‘zi shahar aylanib, nochor va kambag‘al fuqarolarga o‘z hisobidan yegulik hamda kiyim-bosh tarqatgan. Bu olijanob ishdan o‘rnak olgan mamlakatning boy fuqarolari ham keyinchalik muhtojlarga yordam berishni, qarovsiz qolgan keksalarga boshpana ajratib, ularni parvarish qilishni o‘zlariga odat qilishgan. Aynan mana shu an’analar va odatlar rivoji barobarida bugungi kunning zamonaviy volontyorlik faoliyati shakllana boshlagan. Yana bir manbada esa volontyorlik o‘rta asrlarda Yevropada, yirik shaharlarda vabo va o‘lat tarqagan og‘ir davrlarda paydo bo‘lgani aytiladi. O‘shanda hududda bo‘lgan sayohatchi shifokorlar o‘z jonlarini xavfga qo‘yib, bemorlarni beg‘araz davolashga kirishishgan. Bugungi kunda O‘zbekistonda ham volontyorlik harakati juda yuqori cho‘qqiga chiqdi. Mamlakatimizda 2019-yilda «Volontyorlik faoliyati to‘g‘risida»gi maxsus Qonun qabul qilindi. Hozirda yurtimizda O‘zbekiston volontyorlar assotsiatsiyasi va 14 ta hududda faoliyat yuritadigan «Volontyorlar maktabi» tizimi yo‘lga qo‘yilgan. Ushbu maktablarda minglab yoshlar ijtimoiy, tibbiy va ekologik yo‘nalishdagi loyihalarda tumanlar va mahallalar kesimida faol guruhlar tashkil etib, el xizmatiga kamarbasta bo‘lmoqdalar.
Xushvaqt ESHBOYEV
oqqa koʻchirdi.
Об авторе
