Шаҳримиздаги таълим муассасаларида ёш авлод тарбияси, миллий қадриятларга ҳурмат ва экологик маданиятни юксалтиришга қаратилган маънавий-маърифий тадбирлар ўтказилмоқда.
Жумладан, “Зарбулоқ” маҳалласидаги 10-сонли умумий ўрта таълим мактабида ёшларни миллий қадриятларимизга ҳурмат, катталарга эҳтиром ва Ватанга садоқат руҳида тарбиялаш, авлодлар ўртасидаги узвийликни мустаҳкамлаш мақсадида “Уч авлод учрашуви” тадбири ташкил этилди. Унда “Нуронийлар” жамғармаси раиси М.Абдуллаев, маҳалла фаоллари, фахрий нуронийлар, меҳнат фахрийлари, мактаб педагоглари ҳамда ўқувчи-ёшлар иштирок этишди.
Самимий мулоқот руҳида ўтган учрашувда нуронийлар ўзларининг бой ҳаётий тажрибалари билан ўртоқлашиб, ёшларга Ватанга муҳаббат, илм олиш, ҳалол меҳнат қилиш, катталарни ҳурматлаш ва миллий қадриятларга содиқ қолиш ҳақида қимматли фикр ва тавсиялар бердилар.
Шу билан бирга, шаҳримиздаги 4-сонли умумий ўрта таълим мактабида “Экологик билимдон” ҳафталиги доирасида “Қизил китоб билимдони” шиори остида тадбир ўтказилди. Унда 7–10-синф ўқувчилари фаол қатнашиб, Ўзбекистон Республикасининг “Қизил китоби”, унга киритилган ноёб ва йўқолиб бораётган ўсимлик ҳамда ҳайвонот дунёси ҳақида билимларини бойитдилар. Тадбир давомида мавзуга оид савол-жавоблар ўтказилиб, ўқувчиларнинг экологик билимлари янада мустаҳкамланди.
Аслида, бу икки тадбирнинг мақсади турлича кўринса-да, уларни бирлаштириб турган муштарак жиҳат бор. Бу — ёш авлодни билимли, масъулиятли, миллий ва умуминсоний қадриятларга ҳурмат руҳида тарбиялашдир.
Об авторе
