Мамлакатимиз энергетика хавфсизлигини таъминлаш, соҳада қонунийликни мустаҳкамлаш ва аҳолига сифатли хизмат кўрсатиш бугунги ислоҳотларнинг марказида турибди. Шу мақсадда, Прокуратура органлари ва «Ҳудудий электр тармоқлари» АЖ Тошкент ҳудудий филиали ҳамкорлигида 2025 йил давомида амалга оширилган ишлар ҳамда соҳадаги кўрсаткичлар таҳлил қилинди.
Инфратузилма ва истеъмолчиларга хизмат кўрсатиш
Бугунги кунда Тошкент вилоятида электр энергияси етказиб бериш тизими улкан масштабга эга. Вилоят бўйича жами 791 704 та истеъмолчи (шундан 34 689 таси юридик, 757 015 таси аҳоли) мавжуд бўлиб, уларга 24,4 минг км дан ортиқ электр узатиш тармоқлари ва 7 567 та трансформатор пунктлари орқали хизмат кўрсатилмоқда.
Прокуратура назорати остида амалга оширилаётган ўрганишлар шуни кўрсатадики, истеъмолчиларнинг ҳуқуқларини ҳимоя қилиш ва тизимга уланишда коррупцион ҳолатларнинг олдини олиш мақсадида рақамлаштириш ишларига алоҳида эътибор қаратилмоқда.
Давлат хизматлари ва шартномавий мажбуриятлар ижроси
2025 йил давомида Давлат хизматлари марказлари орқали электр тармоғига уланиш бўйича жами 22 460 та мурожаат келиб тушган. Мурожаатларнинг таҳлили қуйидагича:
- Аҳоли (20 кВтгача): 10 780 та;
- Юридик шахслар (20 кВтгача): 7 106 та;
- Юқори қувватли (20 50 кВт ва 50 кВтдан юқори): 4 574 та.
Ушбу мурожаатлар асосида тузилган шартномалар натижасида филиал ҳисоб рақамига 3 095,9 млн сўм маблағ келиб тушган. Таъкидлаш жоизки, жами давлат ва шартномавий хизматлар кўрсатиш бўйича белгиланган 100 миллиард сўмлик режага нисбатан амалда 37 930,5 млн сўмлик (37,9%) ишлар бажарилган. Режа ижросининг ушбу ҳолати прокуратура органлари томонидан соҳадаги самарадорликни ошириш ва мавжуд тўсиқларни бартараф этиш юзасидан қўшимча ўрганиш объекти бўлиб хизмат қилади.
Куз-қиш мавсумига тайёргарлик ва Давлат дастурлари ижроси
Аҳолини барқарор электр энергияси билан таъминлаш мақсадида 2025 йилда улкан ҳажмдаги таъмирлаш ишлари бажарилди:
- 2 616,1 км тармоқ ва 777 та трансформатор пункти мукаммал таъмирланди;
- 6 930 км тармоқ ва 2 126 та трансформаторда жорий таъмирлаш ишлари якунланган.
Айниқса, Ўзбекистон Республикаси Президентининг ПҚ-330 сонли («Камбағалликдан фаровонлик сари») ва ПФ-26 сонли («Янги Ўзбекистон» массивлари) ҳужжатлари ижроси прокуратура органларининг доимий назоратида бўлди. Дастурлар доирасида:
- 853,1 км ҳаво линияси реконструкция қилиниб, 94 та янги трансформатор ўрнатилди.
- Янги массивлар учун 21 км тармоқ, 1 та подстанция ва 12 та трансформатор пункти қуриб битказилди.
Хулоса ва назорат
Энергетика соҳасида амалга оширилаётган ҳар бир лойиҳа ва сарфланаётган ҳар бир сўм маблағ халқимиз манфаатларига хизмат қилиши шарт. Прокуратура органлари «Ҳудудий электр тармоқлари» АЖ билан ҳамкорликда келгусида ҳам:
- Электр энергияси исрофини камайтириш;
- Ноқонуний уланишларга чек қўйиш;
- Давлат дастурлари ижросини ўз вақтида ва сифатли таъминлаш устидан қатъий назоратни давом эттиради.
Мақсадимиз — ҳар бир хонадонда чироқ ёниши ва ҳар бир тадбиркорнинг фаолияти тўхтовсиз энергия билан таъминланишидир.
Асқарали Жўраев,
Ўзбекистон Республикаси Бош прокуратураси бошқарма прокурори.
Об авторе
