Юртимизда хотин-қизларнинг тадбиркорлик фаолиятига кириб келиши, ўз бизнесини йўлга қўйиши ва янги иш ўринлари яратиши бугун давлат сиёсатининг муҳим йўналишларидан бирига айланган. Бу ҳақда Ўзбекистон Республикаси Президенти Шавкат Мирзиёев шундай деган: “Хотин-қизларни қўллаб-қувватлаш – бу жамиятни қўллаб-қувватлаш демакдир. Чунки аёл бахтли бўлган жойда оила ҳам, жамият ҳам тараққий этади.”
Ана шундай фаол, ташаббускор жамиятда ва оилада ўз ўрнига эга бўлган аёлларимиздан бири олий маълумотли тадбиркор Марғуба Тоҳировнадир. У киши билан ҳаёт йўли, тадбиркорликка кириб келиш тарихи ва келажак режалари ҳақида суҳбатлашдик.
— Марғуба Тоҳировна, келинг аввало ўзингиз ҳақингизда қисқача маълумот бериб ўтсангиз.
— Мен 1973 йилда Пискент туманида туғилганман. 1990 йил ўрта мактабни олтин медал билан тамомладим. Шундан сўнг Тошкент давлат иқтисодиёт университетининг “Халқаро иқтисодий алоқалар” факультетига ўқишга кирдим. Биринчи кириш имтиҳонидан “5” баҳо олганлигим сабабли, қолган имтиҳонлардан озод қилинганман. Олий таълимни тамомлагандан кейин оилавий шароит, янги турмуш ва бола тарбияси сабабли, мутахассислигим бўйича ишлаш имконияти бўлмади.
— Янги оила, янги муҳит, бола тарбияси-ю уй юмушларидан ортиб, тадбиркорликка қандай кириб келгансиз?
— Ўша пайтларда тадбиркорлик тушунчаси энди одамлар орасида пайдо бўлаётган давр эди. Пискентда топилмайдиган маҳсулотларни Қозоғистон, Қирғизистон ва Олмалиқ шаҳридан олиб келиб сотардим. Лекин олий маълумотли бўлганим учун кўп вақт ўзимга ўзим “Бу иш сенинг ишинг эмас, бозор сенинг жойинг эмас”, деб айтардим. Шундай бўлса-да, оилам, фарзандларим учун ҳаракат қилардим. Биласиз, замон шиддаткор одамларни яхши кўради. Айтишади-ку, «Юрган одамнинг ўтиргиси, ўтирган одамнинг ётгиси келади», деб.
— Кўчмас мулк соҳасига қандай кириб келгансиз?
— 2007 йил ўзимиз ҳайдаб юрган автомашинани сотиб, кўп қаватли уйдан хонадон сотиб олдик. Орадан икки-уч ой ўтгач, хонадонлар нархи кескин ошиб кетди. Икки ойдан сўнг битта хонадонимнинг пулига иккита хонадон сотиб олдим. Шунда бозор имкониятларини кўриб, кўчмас мулк соҳасига қизиқиш пайдо бўлди. Шундай қилиб, қарийб 16–17 йил давомида кўчмас мулк бозорида фаолият юритдим.
— Кейинчалик тадбиркорлик йўналишингизни ўзгартиришга нима сабаб бўлди?
— Вақт ўтиши билан одамлар янги қурилган уйларни давлат кредитлари орқали сотиб ола бошлади. Бу эса бозордаги шароитни ўзгартирди. Шу сабаб яна янги ғоялар устида изланишни бошладим. Туну кун қандай бизнес қилсам экан, деб изландим. Мен ҳеч қачон аёлман-ку, турмуш ўртоғим боқиши шарт, деб ўйламаганман. Бир куни ижтимоий тармоқлар орқали қўлқоп ишлаб чиқариш ва унинг фойдалари ҳақида бир қизиқарли дастур кўриб қолдим. Ўша кундан бошлаб шу соҳани ўрганишни бошладим. Катта ўғлим олийгоҳни тамомлаган эди ўшанда. Ўғлимга 10 та станок олиб бериб, бирга уйда ишлаб чиқаришни бошладик.
— Гилам ювиш цехини қачондан бошлаб юрита бошладингиз?
— 2021 йилда тендер орқали “Радуга” ҳудудида жойлашган ер майдонини ютиб олдик. Шу ерда замонавий гилам ювиш цехини ташкил қилдик. Бу соҳани Олмалиқ шаҳрига биринчи бўлиб биз олиб кирдик. Цех учун энг замонавий технологияларни Туркиядан олиб келдик. Бизнинг асосий мақсадимиз — гиламларнинг сифатини бузмасдан, тоза ва эҳтиёткорлик билан ювишдан иборат.
— Иккала корхонани юритишда қийинчиликлар бўлмадими?
— Қўлқоп ишлаб чиқаришни йўлга қўйгунча росса иккиландик. Кимга сотамиз, қаердан маҳсулот олиб келамиз, қандай қилиб ишлаб чиқарсак, бизга қийинчилик туғдирмайди, деб. Ниятингиз чиройли бўлса, Яртаган амалини ҳам чиройли қилиб қўяр экан. Ишни дастлаб 10 та ускуна билан бошлаган эдик. Кейин ишлаб турган яна бир цехни сотиб олдик. Эски раҳбари барча йўл-йўриқларни ўргатди. Мижозлари билан таништирди.
Мана бу бизнесни бошлаганимизга ҳам 5–6 ой бўлди. Икки ой бўлдики, даромадга чиқдик. Ҳозир эса бошқа давлатлар билан ҳам шартномалар имзолашга эришдик.
— Келажакда қандай режаларингиз бор?
— Мен хотин-қизлар учун тадбиркорликка оид ўқув курслари ташкил қилмоқчиман. Ҳаёт давомида орттирган тажрибаларимни бошқалар билан бўлишишни истайман. Аёлларимизда имконият ҳам, қобилият ҳам бор. Фақат ишонч ва бироз қўллаб-қувватлаш керак.
Суҳбатдош
Мухлиса Раҳматуллаева.
Об авторе
