Олмалиқ кон-металлургия комбинатининг ишлаб чиқариш қувватларини оширишга қаратилган яна бир инвестициявий лойиҳа — юқори технологик имкониятларга эга бўлган “Ковулди” олтин саралаш фабрикаси фойдаланишга топширилди.
Эътиборли жиҳати, фабрикага ўрнатилган технологик ускуналар ва барча қурилиш ишлари комбинатнинг ички имкониятлари эвазига амалга оширилди. Бу эса корхонанинг маҳаллийлаштириш дастури доирасида олиб бораётган ишларининг ёрқин натижаси бўлиб, маҳаллий мутахассисларнинг юқори муҳандислик салоҳиятини намоён этади. Фабриканинг тантанали очилиш маросимида ОКМК раҳбарияти, комбинатнинг хорижий ҳамкорлари, меҳнат фахрийлари ҳамда жамоатчилик вакиллари иштирок этди. Тадбирда рамзий лента қирқилиб, фабрика расман ишга туширилди.
Тадбир давомида сўзга чиққанлар ушбу лойиҳанинг ишга туширилиши маҳаллий хомашё базасидан оқилона фойдаланиш ва олтин ишлаб чиқариш ҳажмини тизимли равишда ошириш орқали миллий олтин захираларини мустаҳкамлашга хизмат қилишини таъкидлади. Фабрика қурилишида жонбозлик кўрсатган бир гуруҳ қурувчилар, таркибий бўлинмалар раҳбарлари ва мутахассислар Фахрий ёрлиқ ҳамда ташаккурномалар билан рағбатлантирилди. Шундан сўнг тадбир иштирокчилари фабриканинг ишлаб чиқариш қувватлари ва ишчи-ходимлар учун яратилган шароитлар билан танишдилар.
Тадбирда комбинат бош муҳандиси Сергей Ларионов ОКМК бошқаруви раиси Абдулла Хурсановга фабрика расман ишга туширилгани ҳақида ахборот берди. Шундан сўнг корхона ўз фаолиятини бошлаб, дастлабки концентрат олинди. Янги фабрика “Ковулди” ва “Қуйи Кенжасой” конларида қазиб олинадиган маъданларни қайта ишлайди. Унинг қуввати йилига 200 минг тоннагача маъданни қайта ишлаш имконини беради. Лойиҳанинг иккинчи босқичини амалга ошириш ҳам режалаштирилган.
Фабрика қурилиши комбинатнинг “Олмалиқметаллургқурилиш” трести томонидан бажарилди. Шунингдек, Ихтисослаштирилган таъмирлаш ишлари, Ишлаб чиқаришни автоматлаштириш, Автомобиль транспорти ва Моддий-техник таъминот бошқармалари, Техник хавфсизлик тизими хизмати ҳамда Ковулди кон бошқармаси жамоалари лойиҳада фаол иштирок этди. Фабрика қурилиши лойиҳасини ишлаб чиқишда комбинатнинг Лойиҳа ишлари бошқармаси, қурилишни ташкил этишда эса Капитал қурилиш бошқармаси мутахассислари алоҳида ўрин тутди. Лойиҳа доирасида икки қаватли маъмурий-хўжалик биноси, ишчилар учун ошхона, ювиниш хоналари ҳамда қўриқлаш хизмати ходимлари учун қоровулхона барпо этилиб, зарур жиҳозлар билан таъминланди. Фабрикага ўрнатилган флотамашиналар, гидроциклон, тегирмонлар, классификатор, контакт чан ва қуюлтиргич каби технологик ускуналар Марказий таъмирлаш-механика заводида ишлаб чиқарилди. Шунингдек, корхонага кўприкли кранлар ҳам ўрнатилди.
Объект ҳудудида кенг кўламли ободонлаштириш ва кўкаламзорлаштириш ишлари амалга оширилди. Фабрика ишга туширилиши натижасида 151 та янги иш ўрни яратилди.
ОКМК Ахборот хизмати.
Об авторе
