Халқимизда «Қиш ғамини ёзда е» деган нақл бор. Дарҳақиқат, шаҳримизда барча ташкилотлар куз-қиш мавсумига тайёргарлик ишларини аллақачон бошлаб юборишган. Жумладан, «Олмалиқшаҳаргаз» газ таъминоти бўлими томонидан аҳолини куз-қиш мавсумида табиий газ билан узлуксиз, барқарор ва сифатли таъминлаш мақсадида кенг кўламли ишлар амалга оширилмоқда.
Бугунги кунда Олмалиқ шаҳрида жами 38 142 нафар табиий газ истеъмолчиси мавжуд бўлиб, шундан 37 707 нафари аҳоли, 435 нафари улгуржи истеъмолчилар ҳисобланади. Истеъмолчиларга табиий газ «Олмалиқ-1» ва «Олмалиқ-2» газ тақсимлаш станциялари орқали етказиб берилмоқда.
Шаҳарда жами 118 та газ тақсимлаш нуқтаси фаолият юритади. Шундан 18 таси юқори босимли, 100 таси ўрта босимли газ тақсимлаш нуқталаридир. Жорий йилнинг бугунги кунига қадар ушбу нуқталарнинг барчасида техник кўрик ва таъмирлаш ишлари ўтказилиб, эстетик жиҳатдан тартибга келтирилди. Бу эса истеъмолчиларга белгиланган босимда табиий газни барқарор етказиб бериш имконини яратмоқда.
Шунингдек, “Бўстон” маҳалласи ҳудудидаги “Файз”, “Ўрикзор”, “Тараққиёт” ва “Ғалаба” кўчаларида жойлашган 6200 метр ўрта босимли ер усти газ қувурлари икки марта бўялди. “Чамбил” маҳалласидаги “Чамбил”, “Янгиобод” ва “Гулбоғ” кўчаларидаги 3750 метр газ қувурлари ҳам икки марта сариқ рангга бўялди. “Дўстлик” ва “У.Носир” маҳаллалари ҳудудларидаги ер усти газ қувурлари ҳам тартибга келтирилиб, коррозиядан ҳимоя қилиш мақсадида қайта бўялди.
Газ таъминоти бўлими тасарруфидаги 187 та газ қудуғининг 70 тасида газ сизиб чиқиш ҳолатлари бўйича текширув ўтказилиб, улар ҳам эстетик жиҳатдан тартибга келтирилди.
Бу каби ишлардан кўзланган асосий мақсад — қишнинг совуқ кунларида табиий газга бўлган талаб кескин ошадиган даврда аҳоли ва бошқа истеъмолчиларни узлуксиз ҳамда барқарор табиий газ билан таъминлашдир.
Шу билан бирга, Ўзбекистон Республикаси Президентининг 2025 йил 1 апрелдаги ПҚ-133-сон «Ёқилғи-энергия ресурсларидан ноқонуний фойдаланиш ва беҳуда сарфланишининг олдини олиш ҳамда энергия самарадорлигини ошириш бўйича чора-тадбирларни такомиллаштириш тўғрисида»ги қарори ижросини таъминлаш мақсадида маҳалла газчилари томонидан аҳоли ўртасида кенг кўламли тарғибот ишлари олиб борилмоқда.
Фуқароларга хонадонларни очиқ оловли газ ускуналари ёрдамида иситмаслик, энергия тежамкор бўлмаган, сертификатланмаган ҳамда хавфсизлик автоматикаси билан жиҳозланмаган газ ёндиргичларидан фойдаланмаслик бўйича тушунтиришлар берилмоқда.
«Олмалиқшаҳаргаз» газ таъминоти бўлими хонадонларга газ жиҳозлари ўрнатишда уларнинг энергия тежамкор, сертификатланган ва хавфсизлик автоматикаси билан жиҳозланган бўлишига алоҳида эътибор қаратишни тавсия этади. Зеро, бундай жиҳозлардан фойдаланиш, энг аввало, ўзингиз ва оилангиз хавфсизлигининг муҳим кафолатидир.
А.Ж. Абдуғаппоров,
«Олмалиқшаҳаргаз» газ таъминоти бўлими бошлиғи.
Об авторе
