Олмалиқ шаҳар Мудофаа ишлари бўлимида муддатли ҳарбий ҳамда сафарбарлик чақирув резервидаги хизматига ўрганиш ва танлов тадбирлари ўтказилмоқда.
⭐️ Ўзбекистон Республикаси ҳукуматининг тегишли қарорларига асосан Олмалиқ шаҳар ҳудудида яшовчи 2000-2009 йилларда туғилган фуқаролар муддатли ҳарбий хизмат(ДХХ чегара қўшинлари, ИИВ қоровул қўшинлари, Фавқулодда Вазиятлар вазирлиги қўшинлари, Мудофаа Вазирлиги қўшинлари) дастлабки командаларига саралаш ва танлов тадбирларида иштирок этишлари шарт.
📢 Ота-оналар диққатига!
Агар фарзандингиз чет давлатга ўқиш ёки ишлаш учун кетган бўлса мудофаа ишлари бўлими чақирув бўлинмаси ходимларини хабардор қилишни унутманг!
Ўзбекистон Республикаси Президентининг 2026 йил 7 апрелдаги ПҚ-134-сонли Қарори билан белгиланган, муддатли ҳарбий хизматчилар учун асосий имтиёзлар:
🟢1. Олий таълимга кириш имконияти.
2026-2027 ўқув йилидан бошлаб аскар хизмат даврининг ўзида олий таълим ташкилотлари бакалавриятининг масофавий таълим шаклига ҳужжат топшириши ва кириш имтиҳонида қатнашиши мумкин. Тўлов-контракт асосида ўқишга кирган аскарга белгиланган тартибда имтиёзли таълим кредити берилади.
Хизмат вақтида ОТМга қабул қилинган аскарлар ҳарбий тайёргарлик ўқув марказларида таҳсил олган талабаларга тенглаштирилади. Ўқишни тамомлагандан кейин белгиланган тартибда “заҳирадаги лейтенант” унвони берилади.
🟢2. Олий ҳарбий таълимга алоҳида имконият.
Намунали хизмат қилган ва республика ёки халқаро спорт мусобақаларида ёки фан олимпиадаларида 1-ўрин олган аскарлар орасидан 100 нафаргача номзод танлаб олинади. Улар белгиланган квота доирасида олий ҳарбий ва ҳарбийлаштирилган таълим муассасаларига айрим ҳолларда тест ва якуний суҳбатсиз тўғридан-тўғри қабул қилиниши мумкин.
🟢3. Спортчилар учун имтиёз.
Хизмат даврида Олимпия ва Осиё ўйинлари дастурига киритилган спорт турлари бўйича республика ёки халқаро мусобақада 1-ўрин олган аскар Ўзбекистон давлат жисмоний тарбия ва спорт университетига тегишли йўналишларга кириш синовларсиз, давлат гранти асосида қабул қилинади.
🟢4. Хизмат даврида касб ўрганиш.
Ҳарбий қисмларда аскарларнинг қизиқиши ва қобилиятига қараб касбга ўқитиш гуруҳлари ташкил этилади. 6 ойгача бўлган касб-ҳунар курсларида ўқиш имконияти берилади. Курсни муваффақиятли тугатган аскарга давлат намунасидаги сертификат берилади.
🟢5. Хизматдан кейин касб-ҳунар ўргатиш.
Муддатли хизматни тугатиб, хусусий секторда ишлашни хоҳлаган ёшларнинг касб-ҳунарга ўқиш харажатлари белгиланган тартибда ваучер асосида қопланади.
🟢6. Хорижий тил ва фан сертификатлари.
Хизматни ўтаб бўлган ва ОТМда ўқишни хоҳлаган ёшларнинг хорижий тил ва фан сертификати учун харажатлари белгиланган шартларда “Ёшлар дафтари” маблағлари ҳисобидан қопланади.
🟢7. Тадбиркорлик учун қўллаб-қувватлаш.
Хизматни ўтаб, тадбиркорлик билан шуғулланишни хоҳлаган ёшларнинг кредит фоизлари билан боғлиқ харажатлари қонунчиликда белгиланган тартибда қопланиши назарда тутилган.
🟢8. Давлат хизматига ишга киришда қўшимча балл.
2027 йил 1 апрелдан муддатли ҳарбий хизматни ўтаган ёшларга давлат органлари ва ташкилотларига ишга киришда тестда олган баллига нисбатан 10 фоиз миқдорида қўшимча балл бериш тартиби жорий этилади.
✔️ Қўшимча муҳим жиҳат.
2026 йил 1 майдан бошлаб аскарлар орасида касб эгаллаш ва олий таълим олиш истаги бўйича сўров ўтказилиши, ҳарбий қисмларга яқин техникумлар бириктирилиб, уларнинг педагоглари аскарларни касбга ўқитишга жалб қилиниши белгиланган.
Мурожаат учун Олмалиқ шаҳар мудофаа ишлари бўлими ходимлари телефон рақамлари:
☎️ +998-94-931-48-04,
☎️ +998-88-547-10-94,
☎️ +998-97-090-77-36,
☎️ +998-97-012-09-78.
Об авторе
