Жорий йилнинг 24 июль куни Олмалиқ шаҳар Кенгашининг навбатдаги 47-сессияси бўлиб ўтди. Сессияда шаҳар ҳаёти ва ижтимоий-иқтисодий ривожланишига оид муҳим масалалар кўриб чиқилиб, тегишли қарорлар қабул қилинди.
Сессия ишида Халқ депутатлари шаҳар Кенгаши депутатлари, шаҳар ҳокимининг биринчи ўринбосари, тегишли давлат ва хўжалик бошқаруви органлари раҳбарлари, сиёсий партиялар вакиллари ҳамда шаҳар ҳокимлиги матбуот хизмати ходимлари иштирок этишди.
Сессия кун тартибига киритилган масалалар шаҳарни комплекс ривожлантириш, фуқароларнинг мурожаатлари билан ишлаш тизимини янада такомиллаштириш, маҳаллий бюджет маблағларидан самарали фойдаланиш ҳамда сайлов қонунчилиги ижросини таъминлаш каби муҳим йўналишларни қамраб олди.
Дастлаб, Ўзбекистон Республикаси Президентининг Олмалиқ шаҳридаги Халқ қабулхонасининг 2026 йилнинг биринчи ярим йиллиги якунлари бўйича ахбороти тингланди.
Шундан сўнг 2026 йилнинг иккинчи чорагида даромадлар режасини орттириб бажариш ҳисобидан шаклланган қўшимча маблағларни йўналтириш масаласи кўриб чиқилди. Таъкидланганидек, қўшимча молиявий ресурсларни шаҳар инфратузилмасини ривожлантириш, ижтимоий соҳа объектларини қўллаб-қувватлаш, ободонлаштириш ишлари, коммунал хизматлар сифатини яхшилаш ҳамда аҳоли турмуш даражасини оширишга қаратилган лойиҳаларни молиялаштиришга йўналтириш режалаштирилган.
Кун тартибидаги навбатдаги масала Ўзбекистон Республикаси Марказий сайлов комиссиясининг 2026 йил 8 июлдаги 1468-сон қарори ижроси юзасидан бўлди. Сессияда мазкур қарор ижросини сифатли таъминлаш, сайлов жараёнларини амалдаги қонунчилик талабларига мувофиқ ташкил этиш ҳамда масъул ташкилотлар фаолиятини мувофиқлаштириш бўйича амалга оширилаётган ишлар юзасидан ахборот берилди.
Ҳар бир масала юзасидан депутатлар томонидан атрофлича фикр-мулоҳазалар билдирилди, доимий комиссиялар раисларининг хулосалари эшитилди ҳамда тегишли ташкилотлар раҳбарларининг ахборотлари муҳокама қилинди. Сессия давомида кўриб чиқилган барча масалалар бўйича шаҳарни янада ривожлантириш, маҳаллий бюджет маблағларидан оқилона фойдаланиш, фуқароларнинг қонуний манфаатларини таъминлаш ва ҳудуддаги ижтимоий-иқтисодий ислоҳотлар самарадорлигини оширишга қаратилган қарорлар депутатлар томонидан бир овоздан маъқулланди ва тасдиқланди.
Об авторе
