Олмалиқ шаҳрида маҳаллалар инфратузилмасини яхшилаш, аҳолига замонавий шароитлар яратиш ва шаҳар қиёфасини тубдан ўзгартириш мақсадида йирик ҳажмдаги ободонлаштириш ишлари бошланмоқда.
Халқ депутатлари шаҳар Кенгаши қарорига мувофиқ, бу ишлар учун жами 29 миллиард 946 миллион сўм маблағ йўналтирилиши белгиланган.
Манзилли дастур доирасида шаҳар бўйича аниқ рақамлар билан белгиланган ишлар амалга оширилади. Жумладан, 2 та замонавий арка ўрнатилиб, бунинг учун 140 миллион сўм ажратилади. Болалар учун 19 та ўйингоҳ майдончаси барпо этилиб, уларга 2 миллиард 584 миллион сўм сарфланиши режалаштирилган.
Шунингдек, ёшлар учун 19 та воркаут майдончаси ташкил этилиб, бу мақсадга 1 миллиард 501 миллион сўм йўналтирилади. Кўп қаватли уйларнинг ташқи кўринишини яхшилаш мақсадида 37 та объектда фасад таъмири амалга оширилиб, бу ишлар учун 4 миллиард 824 миллион сўм маблағ ажратилади.
Муҳандислик инфратузилмасини яхшилашга ҳам алоҳида эътибор қаратилган. Хусусан, 9 100 метр ирригация тармоқлари таъмирланиб, бунинг учун 4 миллиард 732 миллион сўм сарфланади. Шу билан бирга, 37 500 квадрат метр йўлаклар таъмирланиб, ушбу ишларга 500 миллион сўм ажратилади.
Тунги хавфсизликни таъминлаш мақсадида 180 та ёритиш чироғи ўрнатилиб, бунинг учун 360 миллион сўм сарфланади. Суғориш тизимини такомиллаштириш доирасида 2 та қудуқ қазилиб, 600 миллион сўм маблағ йўналтирилади.
Бундан ташқари, суғориш тармоқларини кенгайтириш учун 37 463 метр тармоқ тортилиши режалаштирилган бўлиб, бу ишларга 4 миллиард 810 миллион сўм ажратилади. Кўп қаватли уйларнинг том қисмларини таъмирлаш бўйича 35 520 квадрат метр ҳудуд қамраб олиниб, бунинг учун 4 миллиард 430 миллион сўм сарфланади.
Шунингдек, 9120 м2 кириш йўлаклари таъмирланиб, бу ишларга 1 миллиард 465 миллион сўм маблағ йўналтирилади.
Манзилли дастурда маҳаллалар кесимида ҳам аниқ рақамлар белгиланган. Жумладан, Чўлпон маҳалласида 15 миллиард 34 миллион сўмлик ишлар амалга оширилиб, унда 10 та болалар майдончаси, 10 та воркаут майдони, 19 та фасад объекти, 4 500 метр ирригация тармоғи, 19 000 квадрат метр йўлак, 100 та ёритиш чироғи ва 1 та қудуқ барпо этилади.
Мирзо Улуғбек маҳалласида эса жами 14 миллиард 912 миллион сўмлик ишлар режалаштирилган бўлиб, унда 9 та болалар майдончаси, 9 та воркаут зонаси, 18 та фасад объекти, 4 600 метр ирригация тармоғи, 18 500 квадрат метр йўлак, 80 та ёритиш чироғи ва 1 та қудуқ қурилиши кўзда тутилган.
Ушбу кенг кўламли ишлар амалга оширилиши натижасида Олмалиқ шаҳрида нафақат ташқи қиёфа, балки аҳоли учун яратилаётган қулайликлар ҳам сезиларли даражада ошиши кутилмоқда. Қарийб 30 миллиард сўмлик инвестиция шаҳарни янада обод, замонавий ва яшаш учун қулай масканга айлантиришга хизмат қилади.
Об авторе
