Ёзги таътил — болалар учун энг қувончли ва кутилган фасллардан бири. Бир йил давомида билим олиб, меҳнат қилган ўқувчилар учун ёз нафақат дам олиш, балки янги қизиқишларни кашф этиш, иқтидорларини ривожлантириш ва соғлом ҳордиқ чиқариш имкониятини ҳам яратади. Шу билан бирга, бу давр ота-оналар олдига муҳим саволни қўяди: фарзандларнинг бўш вақтини қандай қилиб мазмунли ташкил этиш мумкин?
Бугунги кунда рақамли технологиялар ҳаётимизнинг ажралмас қисмига айланган. Аксарият болалар бўш вақтларини телефон, планшет ёки компьютер қаршисида ўтказишга мойил. Бу эса уларнинг жисмоний фаоллиги камайишига, вақтни самарасиз сарфлашига сабаб бўлиши мумкин. Шу боис ёзги таътил кунларини фойдали машғулотлар, спорт, ижодий фаолият ва янги билимлар билан бойитиш долзарб масалага айланмоқда.
Ана шундай мақсадларни кўзлаган ҳолда шаҳар Мактабгача ва мактаб таълими бўлими томонидан ўқувчиларнинг ёзги таътилини мазмунли ташкил этишга қаратилган қатор тадбирлар режалаштирилган. Хусусан, умумтаълим мактаблари қошида “Соғломлаштириш майдончалари” фаолияти йўлга қўйилди.
Мазкур лойиҳа ҳақида батафсил маълумот олиш мақсадида шаҳар Мактабгача ва мактаб таълими бўлимида бўлиб, таълим ташкилотларида тарбиявий ишлар бўйича бош мутахассис Нуриддин Рўзимуродов билан суҳбатлашдик.
— Нуриддин ака, ёзги мавсумда ўқувчиларнинг бўш вақтини мазмунли ташкил этиш ва уларни соғломлаштириш борасида қандай ишлар амалга оширилмоқда?
— Ёз мавсуми таълим соҳаси ходимлари учун масъулиятли даврлардан бири ҳисобланади, — дейди Нуриддин Рузимуродов. — Чунки бу даврда болаларнинг таътилини самарали ташкил этиш, уларнинг соғлиғини мустаҳкамлаш ва фойдали машғулотларга жалб қилиш муҳим вазифадир. Шу мақсадда 2026 йил ёз мавсумида шаҳримиздаги умумтаълим мактаблари қошида “Соғломлаштириш майдончалари” ташкил этилди. Ушбу майдончаларда ўқувчилар спорт-соғломлаштириш машғулотлари, маънавий-маърифий тадбирлар, ижодий тўгараклар ҳамда турли қизиқарли лойиҳаларда иштирок этишлари мумкин бўлади. Асосий мақсад — болаларнинг бўш вақтини фойдали ташкил этиш, уларни соғлом турмуш тарзига йўналтириш ва ижтимоий фаоллигини оширишдан иборат.
— “Соғломлаштириш майдончалари” нечта мактабда фаолият юритади?
— Олмалиқ шаҳрида жами 23 та умумтаълим мактаби мавжуд. Шулардан 7-, 10-, 18-, 20- ва 21-сонли мактабларда ёзги “Соғломлаштириш майдончалари” ташкил этилди. Майдончалар фаолиятига жами 30 нафар педагог ходим жалб қилинди. Фаолият 5 та смена асосида ташкил этилиб, ёз давомида 400 нафарга яқин ўқувчини қамраб олиш режалаштирилган. Жумладан, биринчи сменада 150 нафар, иккинчи сменада 130 нафар, учинчи сменада эса 100 нафар ўқувчи иштирок этади. Бу кўрсаткичлар йилдан йилга ортиб бораётган талаб ва ота-оналарнинг ушбу ташаббусга бўлган қизиқишини ҳам яққол намоён этади.
— Майдончаларнинг иш тартиби қандай йўлга қўйилган?
— Майдончалар бир ой давомида фаолият юритади. Машғулотлар ҳафтасига олти кун — душанбадан шанбагача ўтказилади. Ҳар куни эрталаб соат 08:00 дан 13:00 гача ўқувчилар учун турли тадбирлар ва машғулотлар ташкил этилади. Бу вақт оралиғи болаларнинг кун тартибига мос равишда танланган бўлиб, улар куннинг қолган қисмини оиласи билан ўтказишлари ёки бошқа машғулотлар билан шуғулланишлари мумкин бўлади.
— Машғулотлар қайси тилларда олиб борилади?
— Тўгарак ва машғулотлар ўзбек ҳамда рус тилларида ташкил этилади. Бундан ташқари, инглиз тилини ўрганишга қизиққан болалар учун ҳам алоҳида машғулотлар йўлга қўйилган. Бугунги глобаллашув даврида хорижий тилларни билиш муҳим аҳамият касб этаётганини инобатга олиб, болаларга ёз давомида ҳам билимларини мустаҳкамлаш имконияти яратилмоқда.
— Ушбу майдончаларга кимлар қатнашиши мумкин?
— Майдончаларга 7 ёшдан 14 ёшгача бўлган ўқувчилар қабул қилинади. Иштирок этиш мутлақо ихтиёрий бўлиб, фақат ўқувчининг хоҳиши ва ота-онасининг розилиги асосида амалга оширилади. Болаларнинг мактабга келиб-кетиши ва хавфсизлиги учун ота-оналар масъул ҳисобланади.
— Ўқувчилар учун қандай машғулотлар ташкил этилган?
— Дастур жуда бой ва ранг-баранг. Унда тил ўрганиш, ахборот технологиялари, спорт, рассомчилик, рақс, мусиқа, интеллектуал ўйинлар ҳамда ижодий лойиҳалар ўрин олган. Шунингдек, педагоглар томонидан:
- спорт мусобақалари;
- “Заковат” ва бошқа интеллектуал ўйинлар;
- ижодий танловлар;
- китобхонлик тадбирлари;
- маънавий-маърифий учрашувлар;
• ватанпарварлик ва тарбиявий машғулотлар; - қизиқарли экскурсиялар ҳамда маданий тадбирлар ўтказилиши режалаштирилган.
Бундай машғулотлар болаларнинг нафақат билим ва кўникмаларини оширади, балки уларда жамоада ишлаш, лидерлик, мулоқот қилиш ва дўстона муносабатларни шакллантиришга ҳам хизмат қилади.
— Бошқа мактаб ўқувчилари ҳам ушбу майдончаларда қатнашишлари мумкинми?
— Албатта. “Соғломлаштириш майдончалари” фақат мазкур мактаб ўқувчилари учунгина эмас. Шаҳримиздаги бошқа мактабларда таҳсил олаётган болалар ҳам ушбу имкониятдан фойдаланишлари мумкин. Бунинг учун ота-оналарнинг розилиги бўлиши ҳамда болаларнинг мактабга хавфсиз қатнаб туриши таъминланиши лозим. Мутахассисларнинг таъкидлашича, ёзги таътил даврида болаларнинг бўш вақтини тўғри ташкил этиш уларнинг келажакдаги муваффақиятлари учун муҳим омил ҳисобланади. Спорт билан шуғулланган, китоб ўқиган, янги кўникмалар ўрганган ва тенгдошлари билан фаол мулоқот қилган бола нафақат жисмонан соғлом, балки маънавий ва интеллектуал жиҳатдан ҳам етук бўлиб улғаяди.
Азиз ота-оналар!
Фарзандларингизнинг бебаҳо ёз кунларини мазмунли ташкил этишга эътибор қаратинг. Уларни фойдали машғулотларга жалб этинг. Зеро, бугунги билим, бугунги ҳаракат ва бугунги тажриба эртанги муваффақиятларнинг мустаҳкам пойдеворидир.
Суҳбатдош Мухлиса
Раҳматуллаева.
Об авторе
