Адлия органлари томонидан интеллектуал мулк ҳуқуқларини самарали ҳимоя қилиш ҳамда мазкур ҳуқуқларга ҳурмат ҳиссини янада ошириш мақсадида амалга оширилаётган тарғибот ишлари ва ҳуқуқбузарларга нисбатан қўлланилаётган таъсир чораларига қарамасдан, ҳамон ўзгаларнинг брендидан рухсатсиз фойдаланиш ҳолатлари кўплаб учрамоқда.
Жумладан, Адлия вазирлиги томонидан «J-UNITED GROUP» МЧЖнинг SAP 01503-сон патент билан муҳофазаланган саноат намунасига бўлган ҳуқуқлари «W.N.» ХК томонидан бузилаётганлиги тўғрисидаги мурожаат кўриб чиқилди.
Маълумот учун: Қонунчиликка мувофиқ, буюмнинг ташқи кўринишини ифодалайдиган бадиий-конструкторлик ечими саноат намунаси ҳисобланади. Жисмоний ва юридик шахслар ўзлари ишлаб чиқараётган маҳсулотларнинг ташқи кўринишини саноат намунаси сифатида рўйхатдан ўтказишлари ва белгиланган тартибда ҳимоя қилишлари мумкин. «J-UNITED GROUP» МЧЖ ҳам ўзи ишлаб чиқарадиган профилли зичлагичларнинг ташқи дизайнини интеллектуал мулк объекти сифатида рўйхатдан ўтказган.
Ўтказилган ўрганишлар натижасида «W.N.» ХК томонидан саноат намунасига адаштириб юбориш даражасида ўхшаш бўлган маҳсулотлар ҳуқуқ эгасининг рухсатисиз ишлаб чиқарилганлиги ҳамда савдога таклиф этилганлиги аниқланди.
Ўрганиш жараёнида ҳолат бўйича иккала тадбиркорлик субъекти ўзаро келишувга эришди ҳамда вазирлик томонидан «W.N.» ХК интеллектуал мулк ҳуқуқларининг бузилиши қонунчиликда белгиланган тартибда жавобгарликка сабаб бўлиши тўғрисида огоҳлантирилди.
Ҳурматли тадбиркорлар! Ўз брендингизни рўйхатдан ўтказишингизни ҳамда брендингиздан ноқонуний фойдаланиш ҳолатларига дуч келганингизда Адлия вазирлигининг «1008» ишонч телефони орқали хабар беришингизни ёки info@adliya.uz электрон почта манзили орқали мурожаат қилишингизни сўраймиз!
Об авторе
