Ҳаммаси ишончдан бошланган эди. Оддий сўзлар, оддий ваъдалар, “қисқа вақтда ҳал бўлади” деган гаплар… Лекин шу гаплар ортидан бир нечта инсонларнинг тақдирига оғир синов битилаётганди.
Азиз Пўлатов аввал ҳам суднинг қора курсиси билан тўқнаш келган эди. Шунга қарамай, у яна қалтис йўлни танлади. 2024 йил бошларида у таниши Алишер Эгамов билан бирга ҳаракат қила бошлади. Улар аввал Дилноза Акбарованинг ишончига киришди. Уни кредитини ёпиб беришга ишонтиришди, кейин эса унинг номига бир неча банк орқали катта миқдорда кредитлар расмийлаштиришди. Икки шерик Дилнозанинг банк томонидан ажратилган кредит пулларини ўзларига ундириб олишди. Қарз эса бечора жабрланувчининг гарданига тушди.
Дилноза неча марта уларни судга беришини айтди. Аммо, улар на пулни қайтарди, на кейинчалик қайтаришини айтди.
Бу билан иш тугамади. 2025 йилга келиб, А.Пўлатов яна бир нечта одамларни алдади. Кимгадир “кредитингни ёпиб бераман” деди, кимгадир “пулингни кўпайтириб қайтариб бераман” деб ишонтирди. Кимнингдир телефони орқали онлайн кредит олди, кимнингдир қўлидаги нақд пулни олиб, қайтармади. Ҳар сафар бир хил йўл, бир хил алдаш билан одамларни ишончига кириб оларди. У ваъда бераётганда шерикларини олиб бориб рол ўйнарди. 3-4 киши бизни А.Пўлатов қийинчиликдан чиқарган, оғир кунимизда ёнимизда туриб кредит олиб берган дея «кўкка кўтарарди».
Айрим ҳолатларда у ёлғиз эмас эди. Улар ҳам бу осон пул гирдобидан чиқиб кета олмади. Аммо вақт ўтиб, барча излар очилди, шикоятлар кўпайди, жиноят иши қўзғатилди.
2025 йилнинг кузида барча жабрланувчиларнинг оҳи зуд залида янгради. Судда ҳар бир воқеа бирма-бир очилди. Ким қачон, кимни, қандай алдагани аниқланди. Айбловлар ўқилди, иқрорлар ҳам бўлди, инкорлар ҳам. Аммо далиллар А.Пўлатов ва унинг шерикларининг асл юзини очиб ташлади.
Ўзингиз ўйлаб кўринг, нега шунчалик соддамиз, етти ёт бегонага ҳам 100 млн сўмдан ошиқ пулимизни ишониб топширамизми?!
Суд қарор чиқарди. Пўлатов такроран содир этилган фирибгарлик учун айбли деб топилди. У икки йил муддатга озодликдан маҳрум этилди ва унга одамлардан олган пулларини қайтариш шарти ҳам қўйилди.
Муҳаммад Каюмов,
жиноят ишлари бўйича шаҳар суди судьяси.
Об авторе
